Me fondet e dhuruara nga Republika Çeke, Shoqata mund të blinte materiale cilësore dhe të prodhonte proteza gjymtyrësh që u jepnin njerëzve një shans për t'u rikthyer përsëri në një jetë aktive normale.

Ceremonia e përurimit u bë në ambientet (punëtorinë) e shoqatës “Shpresë për Jetën”, ku projekti kontribuoi pozitivisht në vazhdimësinë e mëtejshme të punës së dobishme të shoqatës.

Ambasadori Karel Urban informoi të pranishmit se Republika Çeke financon çdo vit të paktën një projekt të ndihmës zhvillimore në sektorin e shëndetësisë në Shqipëri.

Këtë vit, përveç këtij projekti, Çekia do të sigurojë edhe shtretër spitalor çek për spitalin “Nënë Tereza” në Tiranë. Vitin e kaluar furnizoi maternitetin Koco Gliozheni me një inkubator neonatal dhe një çantë transporti neonatal nga prodhues çekë, ndërse në vitin 2021 ndihmoi në pajisjen e dhomës së lojërave për fëmijë dhe dhomës së vizitave për prindërit në departamentin onkologjik të Spitalit të Fëmijëve në Tiranë.