Në seminarin e ekspertëve si dhe prezantimin e projektit mori pjesë edhe zëvendësministri i Ministrisë për Tregti dhe Industri, z. Faton Thaçi, kryetari i Odës Ekonomike të Kosovës, z. Safet Gërxhaliu , diplomati i Ambasadës së Çekisë në Prishtinë, z. Vítězslav Pur, si dhe 70 përfaqësues të afarizmit dhe të administratës publike, që u mbajt në hotelin “Sirius”- Qendra e Konferencave. Zëvendësministri, z. Thaçí, vlerësoi lart ndihmën e Bashkëpunimit të Jashtëm Zhvillimor të Çekisë. Ai, po ashtu, i informoi mysafirët e pranishëm për planet e Qeverisë së Kosovës për ndihmë kompanive të vogla dhe të mesme  me qëllim të përmirësimit të afarizmit të tyre dhe të zvogëlimit të pengesave të ndryshme. Kryetari i Odës Ekonomike të Kosovës, z. Gërxhaliu, çmoi lart përfitimet e ndërmarrjeve të vogla dhe të mesme nga projekti çek, si një mjet i rëndësishëm metodologjik për planifikimin e veprimtarive afariste. 

Në seminar u prezantuan rezultatet kryesore të projektit, si faqja e internetit në gjuhën angleze dhe në ate shqipe (www.oek-biznesplan.org), ku përfshihet doracaku online se si të hartohen planet afariste, përfshirë instruksionet pamore. Po ashtu, në videon prezantuese në faqe të internetit ka disa shembuj të afaristëve të Kosovës të cilët kanë zhvilluar planet e tyre afariste. Kompania “Alchemy Capital”, po ashtu, është përfshirë në projekt në web prezantim.   

Synimi i projektit është përmirësimi i gjendjes afariste në përgjithësi dhe ngritjen e potencialit të ndërmarrjeve të vogla dhe të mesme në Kosovë. Kjo do të bëhet përmes realizimit të veprimtarive të projektit, në veçanti duke këmbyer përvojën dhe praktikat bashkëkohore në zhvillimin e planeve afariste. Duke përcjell bashkëpunimin e suksesshëm, brenda projektit, kompania GEOtest dhe Oda Ekonomike e Kosovës nënshkruan një Marrëveshje Mirëkuptimi.