Simpoziumi u shoqërua me një ekspozitë të veprave të Kafkës dhe librave për të në gjuhën shqipe nga koleksionet e Bibliotekës Kombëtare. Gjithashtu, ai përfshiu narracionin e figurës kryesore të letrave çeke Markéta Mališová, leximin e përkthimeve të përzgjedhura të veprës së autorit në shqip, si dhe performancën e Charlotte Aigner, zëvendëspresidente e Shoqatës Austriake ‘Franz Kafka’.

Dashamirëset dhe njohëset e veprave të Kafkës, Markéta Mališová dhe Charlote Aigner, të ardhura nga Praga dhe Vjena, shpjeguan faktorët themelorë që ndikuan në veprën e Kafkës dhe momentet e fundit të jetës së tij në sanatoriumin në Klosterneuburg. Në këtë takim u mblodhën shkrimtarë, përkthyes, botues, pedagogë, studentë dhe gazetarë. Ai u shoqërua me shumë thënie të pavdekshme të Franz Kafkës.

"Logjika mund të jetë e palëkundur, por nuk mund t'i rezistojë një personi që dëshiron të jetojë." Franz Kafka

Takimi krijoi mundësinë e njohjes më të thellë të veprës së autorit kult, e cila në fillim është e vështirë për t'u kuptuar nga shumë lexues, por që, sipas fjalëve të tij, "nuk është gjë tjetër veçse letërsi dhe nuk mund dhe nuk dëshiron të jetë asgjë tjetër".