Ministri i Integrimeve Evropiane, Bekim Çollaku, për këtë vizitë tha: “(Mogherini) solli porosi të qarta të perspektivës evropiane për rikonfirmimin e gatishmërisë së Kosovës për ta nënshkruar MSA-në, përkrahjen e sajë për procesin e liberalizimit të vizave në harmoni me përmbushjen e kritereve…si dhe vazhdimësinë e dialogut për normalizimin e mardhënieve mes Kosovës dhe Serbisë”.

Në debatin e zhvilluar në Bibliotekën Kombëtare, në prani të studentëve (përfshirë studentët nga pjesa veriore e Kosovës), përfaqësuesve të bashkësisë diplomatike, atyre nga jeta akademike e Kosovës dhe opozita, Mogherini kryesisht iu drejtua gjeneratës së re. Në fjalimin e sajë, të prezantuar nga zonja Presidente Atifete Jahjaga, Mogherini theksoi shpresën dhe energjinë e gjeneratës së re si dhe perspektivën e saj të ndritshme për të ardhmen, duke vënë theks në domosdonë e tejkalimit të pengesave kundër-prodhuese nga e shkuara. Mogherini e përshkroi Kosovën në dy fjalë: energji dhe ardhmëri.