Pranim - dorëzimi i autobusëve u bë në depon e kompanisë prishtinase “Trafiku Urban”, në praninë e kryetarit të Prishtinës, Ministrit të Financave, përfaqësuesve të BERZH-it, Ambasadorit të Çekisë, përfaqësuesve të “Trafikut Urban” dhe të medieve.

Kryetari i Prishtinës, Shpend Ahmeti, tha: “Prezantimi i autobusëve të rinj shënon fillimin e reformës së madhe të transportit publik në Prishtinë. Ata do të ofrojnë një shërbim të qëndrueshëm dhe bashkëkohor për të gjithë qytetarët duke zvogëluar dukshëm ndotjen. Ky është investimi i parë publik komunal i BERZH-it në Kosovë. Kredia për autobusët do të kompletohet me një grant të ndihmës teknike”. Ai, po ashtu, tha se 51 autobusë nuk do të jetë numri përfundimtar. Prishtina ka nevojë për 160-200 autobusë për të siguruar transport të plotë publik. Komuna do të blejë gjysmën e tyre dhe gjysma tjetër do të sigurohet nga investitori privat. Ministri i financave, Avdullah Hoti, tha se mbështetja e komunave të Kosovës me kredi nga BERZH-i dhe institucionet bankare do të vazhdojë edhe në të ardhmen.  

Ambasadori i Çekisë, Ivo Šilhavý, tha: “Funksionimi i mirë i transportit publik dhe me mjedis miqësor ofron jetë të begat dhe të shëndetshme për një qytet. Unë, jam i kënaqur që transporti publik në Prishtinë është duke u transformuar në një sistem bashkëkohorë. Republika e Çekisë përkrahë Kosovën në rrugën e sajë drejtë BE-së. Kjo, nënkupton jo vetëm mbështetje politike por edhe përkrahje në përmirësimin e standardeve të jetës së qytetarëve. Falë investimit të BERZH-it, autobusët e rinj hyjnë në shërbim që tani. Më pak emitim dhe më pak zhurmë, më shumë besim dhe rehati – kjo është porosia që sjellin këta autobusë”.      

Jiří Škeřík, menaxheri i “Iveco CZ” për Ballkan, vlerësoi bashkëpunimin me partnerin kroat, në këtë tender, dhe konfirmoi negociatat në plotësimin e kontratës për 21 autobusë te tjerë. Ai, po ashtu shprehu shpresën se kjo kontratë do të ngrit mundësitë për të porositur më shumë autobusë të “Iveco CZ” për qytetet e Kosovës dhe të Ballkanit Perëndimor.   

Transporti publik në Prishtinë dhe në Kosovë ofron mundësi të rëndësishme për ngritje. Autobusët e tashëm që punojnë në Kosovë, kryesisht janë automjete të përdorura dhe të importuara nga vendet e BE-së, kushtet teknike të të cilave nuk i plotësojnë kërkesat për punë të padëmshme. 

Blerja e autobusëve të rinj, për Prishtinën, u bë ngjarje e madhe që tërhoqi vëmendjen e medieve që nga dita e nënshkrimit të kontratës në shtator 2016. Ardhja e autobusëve në Kosovë, në fund të dhjetorit 2016, u vëzhgua nga mediet dhe natyrisht koha e parapëlqyer ishte pranim - dorëzimi i autobusëve më 11 janar 2017, që u vazhdua me një gjiro të autobusit me mysafirë dhe gazetarë, nëpër qytet.