Айлчлалын үеэр Ерөнхийлөгч Хүрэлсүх Чех Улсын Ерөнхийлөгч Петр Павел, Сенатын дарга Милош Выстрчил, Ерөнхий сайд Петр Фиала болон бусад Чехийн албаны хүмүүстэй уулзаж, яриа хэлэлцээ хийлээ. Тус айлчлалын хүрээнд боловсрол, хууль, хөдөө аж ахуй, байгаль орчны хамгаалал, аюулгүй байдлын салбаруудад хамтран ажиллах тухай хэд хэдэн чухал хэлэлцээрүүд байгуулагдав.

Хөтөлбөрийн  гол үйл явдлууд нь Ерөнхийлөгч нарын албан ёсны яриа хэлэлцээ, чухал гэрээнүүдэд гарын үсэг зурах, эдийн засаг, соёлын хамтын ажиллагааг дэмжих чиглэлээр хийсэн алхмууд байлаа.  Дараах чухал гэрээ хэлэлцээрүүдэд гарын үсэг зурсан байна. Үүнд:

• Монгол, Чехийн хоорондын иж бүрэн түншлэлийн талаарх хамтарсан тунхаглал: Хоёр орны Гадаад хэргийн сайд нар гарын үсэг зурав.
• Цагдаагийн хамтын ажиллагааны гэрээ: Криминологи болон зохион байгуулалттай гэмт хэргийн эсрэг хамтран ажиллах чиглэлээр туршлага солилцох зорилготой.
• Боловсролын хэлэлцээр: Монгол оюутнуудад Чехийн их, дээд сургуульд суралцах боломжийг нэмэгдүүлэх зорилготой.
• Хөдөө аж ахуйн хамтын ажиллагааны Санамж бичиг: Технологийн солилцоо болон Монголын бүтээгдэхүүнийг Европ руу экспортлоход дэмжлэг үзүүлэх зорилготой.
• Байгаль орчныг хамгаалах тухай гэрээ: Устах эрсдэлд өртөөд байгаа Монголын хаалатгай тэмээг хамгаалах зорилготой.

Айлчлалын үеэр 100 гаруй бизнес эрхлэгч оролцсон бизнес эрхлэгчдийн форум зохион байгуулагдсанаас гадна Монголын Морин хуурын чуулгын концертийг ч толилуулав.