Бүгд Найрамдах Чех Улсын Шадар сайд Мариан Юречкагийн айлчлал
06.11.2023 / 04:45 | Aktualizováno: 09.01.2024 / 04:46
2023 оны 10 дугаар сарын 31-нээс 11 дүгээр сарын 2-ны хооронд Бүгд Найрамдах Чех Улсын Засгийн газрын Шадар сайд бөгөөд Бүгд Найрамдах Чех Улсын Хөдөлмөр, нийгмийн асуудал хариуцсан сайд Мариан Юречкагийн албан ёсны айлчлал боллоо. Түүнийг дагалдан БНЧУ-ын Хөдөлмөр, нийгэм хамгааллын яам, БНЧУ-ын Үйлдвэр худалдааны яам, БНЧУ-ын Хөдөө аж ахуйн яам, Байгаль орчны яам зэрэг дөрвөн яамны төлөөлөл, бизнесийн төлөөлөл ирсэн юм.
Шадар сайд Юречкаг Монгол Улсын төрийн өндөрлөгүүд УИХ-ын дарга Г.Зандаршатар, Гадаад харилцааны сайд Б.Батцэцэг, Байгаль орчин, аялал жуулчлалын сайд Б.Бат-Эрдэнэ, Хөдөлмөр, нийгмийн хамгааллын сайд хатагтай Ч. Булгантуяа нар хүлээн авч уулзав.
Чех-Монголын Эдийн засгийн хамтын ажиллагааны Засгийн газар хоорондын хамтарсан комиссийн хуралдаан болон Чех-Монголын бизнес форумыг шадар сайд Юречка тус тус нээж үг хэлэв. Түүнийг монголын томоохон хоёр их сургууль болох МУИС, ШУТИС-ийн ректорууд хүлээн авч уулзсан бөгөөд ШУТИС-д чех программ хангамжаар тоноглогдсон компьютерийн ангийг хүлээлгэн өглөө. Мөн ноён Юречка чехийн үндэсний их баярт зориулсан уламжлалт хүлээн авалтыг нээж үг хэлснээс гадна айлчлалынхаа хүрээнд ноос боловсруулах үйлдвэрийн бохир ус цэвэрлэх төхөөрөмжийг гардуулан өгсөн юм. Мөн Монголд үйл ажиллагаа явуулдаг Чехийн төрийн бус байгууллагууд болох Пийпл ин нийд, Харитас Чех зэрэг байгууллагуудын төлөөлөлтэй уулзав.
Төрийн айлчлал нь Монгол, Чехийн хэвлэл мэдээллийнхний анхаарлыг ихээхэн татсан. БНЧУ-д ажиллах монгол ажилчдын жилийн квотыг 1000-аас 3000 болгон өргөтгөх тухай Нийгмийн хамгаалал, хөдөлмөрийн яамнаас өгсөн мэдээлэл нь Монголд энэ удаад өгсөн хамгийн гол мэдээлэл байв.