Сұхбаттасушылар мәселелердің кең ауқымын талқылап, саяси, сауда-экономикалық және мәдени-гуманитарлық салалардағы өзара тиімді ынтымақтастықты кеңейтуге дайын екендіктерін растады.

«Астана энергетика, көлік, машина жасау, ауыл шаруашылығы және басқа да салаларда чех компанияларымен өзара іс-қимылды арттыруға мүдделі. Біздің мақсатымыз – осы салалардағы өсім мен инновацияларға ықпал ететін өзара тиімді серіктестік орнату», – деді А. Исетов.

Осы орайда ол 2025 жылғы сәуірде «Қазатомөнеркәсіп» пен чехиялық «ČEZ» (ЧЕЗ) компаниясы арасында Чехияның атом электр станциялары үшін қазақстандық уран концентратын жеткізуге жасалған келісімшартты ерекше атап өтті. Бұл екіжақты ынтымақтастықты нығайту жолындағы маңызды практикалық қадам болып табылады.

Тараптар өзара сауда мен инвестиция көлемін одан әрі ұлғайту үшін айтарлықтай әлеуеттің бар екенін мәлімдеді. Осыған байланысты Экономикалық, өнеркәсіптік және ғылыми-техникалық ынтымақтастық жөніндегі Қазақстан-Чехия үкіметаралық комиссиясы жұмысының маңыздылығы атап өтіліп, оның 2025 жылы өткен 12-ші отырысының қорытындыларына оң баға берілді.

Кездесу соңында дипломаттар бірлескен бастамаларды жүзеге асыру арқылы өзара тиімді серіктестікті одан әрі тереңдетуге жәрдемдесуге уағдаласты.