Me mbështetjen çeke, ISP-ja ka ngritur muzeun virtual të kujtesës (për më shumë informacion vizitoni www.muzeuimemories.info). Qëllimi i këtij muzeu virtual është informimi dhe ndërgjegjësimi i të rinjve për periudhën e komunizmit përmes publikimeve të studimeve dhe raporteve të ndryshme bazuar mbi fakte. Për më tepër, ISP-ja me ndihmën Çeke të Tranzicionit ka zhvilluar edhe një hartë online të burgjeve të diktaturës me qëllim ndërgjegjësimin e nxënësve dhe studentëve.

Ndërkohë, këtë vit fokusi i bashkëpunimit kanë qenë bisedat e hapura me studentët për gjendjen e të Drejtave të Njeriut në komunizëm. Me ndihmën e posterave, pyetësorëve, videove, etj. ISP-ja ka treguar faktet mbi këto të drejta përgjatë kësaj periudhe. Informimi i hollësishëm i brezit të ri qe synimi kryesor i këtyre takimeve.

Për të sjellë përvojën e vendit të tij, Ambasadori i Republikës Çeke në Tiranë SH.T.Z. Karel Urban bisedoi me studentët e universiteteve dhe shkollave të mesme të Tiranës, Vlorës, Dibrës, Pogradecit etj. Ambasadori foli për Çekinë përgjatë dhe pas komunizmit, nevojën e përballjes me të shkuarën, dhe sfidat e shoqërisë postkomuniste.

Nga ana e tyre, studentët treguan historitë e familjeve të tyre të persekutuara gjatë regjimit komunist dhe bënë pyetje në lidhje me periudhën e tranzicionit në Çeki.